تنمية بشرية

لماذا يجب عليك أن تصغ للآخرين؟

عارفين إيه أكتر حاجه ممكن تعمل مشاكل بين أي اتنين في الحياه ؟

هي عدم الاستماع بشكل جيد.

خليني أوضح لكم أكتر , لما بيكون في زوجين في علاقه دايماً تلاقي المشاكل متوقفه علي أن واحد فيهم بيتكلم والتاني مكبر دماغه ومش بيسمع , أو مش عايز يسمع , بيريح نفسه ومش بيكلف نفسه حتي أنه يفكر في اللي الطرف التاني بيقوله!

ومن هنا بتبدأ المشكله..

 

أعظم حاجه ممكن الإنسان يعملها في حياته هي انه يسمع , يبقي مستمع جيد زي ما كلنا بنسمع , يعني إيه مستمع جيد وإزاي أقدر أدرب نفسي علي كده؟؟

 

خليني أفهمك ببساطه , كونك مستمع جيد ده بيتيح للناس اللي حواليك أنهم ياخدوك ملجأ ليهم , لما يقع الأختيار عليك إنك تسمع حد , ماتخذلوش , اديله فرصته وخليه يتكلم , يعبر عن اللي جواه ويفضفض لك ,

هتقعد تسأل نفسك , طب لو أنا ماعنديش إجابه ولا ماعنديش حل للمشكله ولا مثلاً مابعرفش أقدم نصحيه هعمل إيه ؟؟؟

 

لازم تفهم وتعرف كويس إن اللي بيحتاج يتكلم وحد يسمعه , مش بيكون مستني نصيحه ولا رأي معين ولا حتي مستني عتاب ولا حل للمشاكل بتاعته , لأن كلنا كبار وناضجين كفايه إننا نكون عارفين إن ماحدش هيحللنا مشاكلنا غيرنا , اللي بيحتاج يتكلم وحد يسمعه , بيكون محتاج يتسمع بس!

أيو يتسمع بس , زي ما بقولك كده , محتاج حد يديله اهتمام , ويبقي في مركز في كلامه وفي اللي هو بيقوله , ومش مهم أنت عندك رد ولا لا المهم أنك قدمت له من وقتك اللي هو محتاجه عشان يتكلم ويحكي.

 

ساعات بنتحط في مواقف زي إننا مش بنبقي عارفين نواسي اللي قدامنا ولا ننصحه ولا بنبقي عارفين حتي هو محتاج إيه وقتها , بس ماتقلقش , كفايه أوي أنط تركز في اللي بيقوله ووسط الكلام تسأله سؤال أو اتنين بالكتير عشان تحسسه قد إيه أنت مهتم , وبعد كده تسيب له مجال الكلام بحريه , وفي الآخر لو مالقتش رد معين تقوله , يكفي إنك تحسسه أنك موجود وتقوله وتعرفه أنك جنبه وأنك هتسمعه وقت ما يحتاج يتكلم وأنك كمان مش متضايق من وجوده , صدقني الكلام ده له تأثير كبير علي اللي قدامك وهايحس براحه نفسيه بعدها لمجرد أنه حكي معاك!

عود نفسك إنك تبقي مستمع جيد , ماتمسكش تليفونك وحد بيكلمك , وماتعملش حاجه تشتت انتباهه , خليه يتكلم براحته واديله مطلق الحريه في التعبير عن اللي جواه , وصدقني مع الوقت هتشوف نتيجة اللي انت بتعمله وقد إيه له تأثير إيجابي علي اللي حواليك , سواء كان زوج او زوجه أو صاحب أو حبيب أو أهل , كلنا محتاجين نطبق القاعده دي في حياتنا , وهي إننا نسمع بعض.

 

 

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق